Бяцхан хүүгийн жинхэнэ аврагч нар нь 63 дугаар ангийн алба хаагчид байжээ

2018-10-17 Нийгэм

“Бага насны хүүхэд ууланд төөрсөн гэх дуудлагын дагуу энэ сарын 14-ний өдөр Онцгой байдлын болон Цагдаагийн алба хаагчид хамтран ажиллагаа явуулж таван настай хүүхдийн амь насыг авран хамгаалжээ” үнэхээр сайхан мэдээ. Монгол Улсын нэг иргэн ачит төрийнхөө буянаар амьд үлдэж .Бяцхан үр ус уух хувьтай байжээ. 

Гэвч нэгэн таагүй зүйл энэхүү үйл явдлын дунд болоод өнгөрснийг ил гаргахгүй байж боломгүй нь. Энэхүү мэдээллийн талаар тухайн үед бүх л хэвлэл мэдээллээр “Баянзүрх ууланд хүүхэд төөрсөн байна гэх дуудлагын дагуу Баянзүрх дүүргийн цагдаагийн 3-р хэлтсийн 65 алба хаагч, Онцгой байдлын хэлтсийн 87 алба хаагч ажиллаж, хэсгийн байцаагч, цагдаагийн ахлах дэслэгч Д.Наранбаатар, эргүүлийн офицер, цагдаагийн дэслэгч Э.Мөнхбаатар, хороо хариуцсан цагдаа, цагдаагийн дэд ахлагч Б.Мягмар нар ажиллагаа явуулсны дүнд Батсүхийн Тамирыг хаднаас гэмтээд, модноос дүүжлэгдсэн байхад нь олжээ” хэмээж байв. Бүр тодруулбал, Б.Тамир хүүг хэсгийн байцаагч, цагдаагийн ахлах дэслэгч Д.Наранбаатар, эргүүлийн офицер, цагдаагийн дэслэгч Э.Мөнхбаатар, хороо хариуцсан цагдаа, цагдаагийн дэд ахлагч Б.Мягмар нар эрлийн ажиллагаа явуулж байх явцад буюу анх олсон мэт мэдээллийг олон нийтэд цацсан. Цагдаа нарын ярьж буйгаар хүүг анх олох үед тэрбээр таван метрийн хаднаас унан модонд дүүжлэгдсэн байсныг цагдаагийн алба хаагчид дээр дээрээ давхарлан тумбааш маягаар аварсан юм гэнэ.

Гэтэл бодит байдал дээр Гал унтраах 63 дугаар ангийн дэд ахлагч Б.Тамир, ахлах ахлагч Ц.Доржхуяг нар хүүг эхэлж олсон аж. Тэд хүүг олох үед бяцхан жаал өндрөөс унан хөлөндөө гэмтэл авч, бээрсэн байдалтай өргөст модны ёроолд хэвтэж байсан гэнэ. Тиймээс хүүг ахлах ахлагч Ц.Доржхуягийн аврах ажиллагааны хувцасанд хөлийг нь хөндөхөөс сэргийлж боож авч явж байхад дээр дурьдагдсан цагдаагийн гурван алба хаагч тэврээд зураг авахуулъя гэх нэрээр хүүг авч хучлагыг нь тайлан өдгөө хэвлэл мэдээллээр цацагдаад буй зургийг авахуулсан байгаа юм. Энэ үеэр цагдаа нар “Ёндоо ёндоо” гэж уухайлж байсан нь ёс зүйгүй бөгөөд хүний төлөө гэсэн сэтгэл бус шууд л шагнал гэсэн санаа бодол толгойд нь буусан гэлтэй. Ингээд л гол аврагчийн дүрд тоглож эхэлсэн дэг үү.

Эцэст нь хэлэхэд, төрийн өмнө үүрэг хүлээсэн эрхэм цагдаа нар ингэж худраггүй байж болохгүй ээ. Хүний алтан амиар пиар ч гэмээр юм уу, нэр төр хөөцөлдөх чинь ариун явдал уу. Хууль сахиулагч нар нь ийм шударга бус байхаар жирийн иргэн бид чинь хэнд итгэж найдах болж байна. Харин “Алтан амиа үл хайрлан тэмцэнэ” гэх тангарагтай өдөр бүр хүний амь нас, эд хөрөнгийг хамгаалж, аварч алхам тутамдаа цагтай уралдан албаа хаадаг аврагчид болох Энэ цагийн эгэл баатрууд гэж тодотгомоор 63 дугаар ангийн аврагч нар “Зөвхөн бид үүргээ гүйцэтгэсэн” гэж мишээж зогсох нь өөрийн эрхгүй бахархах сэтгэл төрүүлж байна.

О.Гэрэл

<

© 2018 newsmedia.mn. Бүх эрх хуулиар хамгаалагдсан.