Энэ хүний өмнө хэлсэн тайлбар одооныхоосоо алд дэлэм зөрөөд байна

Энэ нөхрийн амнаас алд зөрүүтэй үг, өгүүлбэр урсаад байна. Тэр хэдхэн жилийн өмнө оффшор данстай холбогдсоны дараа мэдэгдэл хийхдээ, би хоёр найзтайгаа нийлж оффшор бүсэд компани байгуулж данс нээж мөнгө байршуулсан гэж тайлбарлаж байсан.

Яагаав тухайн үед дансанд байсан мөнгөө мартаж, хөрөнгө оруулгын мэдүүлэгээ бөглөдөг нөхөр чинь энэ С.Баярцогт шүү дээ.

Бүр тодруулбал, мань эр “Миний бие энэ байдлаа өөрийн хөрөнгө оруулгын мэдүүлэгтэй дурьдаагүй нь улстөрчийн хувьд ёс зүйгүй үйлдэл болсон байна” гэж мэдэгдээд, ёс зүйн хариуцлага хүлээж УИХ-ын дэд даргын суудлаас огцорч байлаа. Ийнхүү дараахан нь шинэчлэлийн Засгийн газар унаж, шийдлийн Засгийн газрын сайд болоод дэвшээд явчихсан гэдгийг ард түмэн мартаагүй байлгүй.

Гэтэл өнөөдөр Швейцарийн дээд шүүхээс “Рио-Тинто” корпорацитай Оюутолгой төслийг байгуулахад ажилласан Монгол Улсын Сангийн сайд асан С.Баярцогттой холбоотой авлигын хэргийг хэлэлцээд, Швейцарийн банк дахь түүний данс,  үлдэгдэл болох 1.85 сая ам.долларыг битүүмжлэх шийдвэр гаргалаа.  Мөн АТГ-аас энэ асуудлыг Швейцарийн Ерөнхий  прокурорын газартай хамтран шалгаж байгаа гэдгээ мэдэгдсэн.

Ийм нөхцөл байдлын гол дүр болоод байгаа С.Баярцогт эрс тэс юм ярьчихсан л явна. Юун хоёр найзтайгаа нийлж, оффшор бүсэд компани байгуулан данс нээж мөнгө байршуулах вэ. Тэр тэгээгүй гэнэ. Харин Монголын нэг нэртэй баян “ахаасаа” 10 орчим сая ам.доллартай тэнцэх евро зээллэж оффшор дансруу хийгээд эдийн засгийн хямралын үе таараад буцаагаад гаргаад өгсөн гэнэ үү!

Өөрөөр хэлбэл, хоёр найзтайгаа нийлж 1 сая ам.доллар байршуулсан гэдэг нь 10 сая ам.доллартай тэнцэх евро болчихлоо, өмнө энэ тухай огт дурьдаагүй олон сая евро зээлдэг Монголын нэртэй баян бизнесмен гараад ирлээ шүү… 

Үгүй тэгээд хаврын хайлган цагаар хүн амьтан санадаргахаар хэний ч синдром хөдлөх ч юм уу. Хөөрхий түүнийг болсон үйл явдлаа үнэн мөнөөр нь эргэн санах хүртэл нь жаахан хугацаа олгох хэрэгтэй ч юм шиг. Энэ хүн санадарч тэвдээд өнгөрсөнд юу болсноо ч санах тэнхэлгүй суугаа юм биш үү.  Эсвэл энэхүү ээдрээтэй хэрэг явдлыг яг буруу улиралд сөхөж, тайван суусан хүний хамаг юмыг хөдөлгөчихлөө шүү. 

Ямартай  ч түүнд  8.2 сая евро зээлсэн тэр бэл бэнчинтэй бизнесмен хэн байсан, эсвэл С.Баярцогтын хоёр найз байв уу гэдгийг тун удахгүй Швейцарь, Монголын хуулийнхны шалгалтаар тодорхой болж, эрхэм Сангийн сайд асанд сануулаад өгөөсэй билээ. Савангийн дуурьт гардаг шиг юм эрхэм хүний ой тогтоолд тохиолдоогүй байгаа даа. Яах аргагүй л нэг юмыг цаг хугацааны зөрүүтэй хоёр янзаар яриад байх юм, мэдэхгүй ээ.

О.ГЭРЭЛ